上星期六西甲爆大冷，衞冕嘅巴塞隆拿主場以1:2不敵升班馬艾拉維斯，爆出咗30倍客W！點解巴塞咁失威？之唔係因為留力囉！喺「MSN」組合中，巴塞教頭安歷基只係派出咗尼馬任正選，就算有柏高艾卡沙及門將施利臣「地標」，同埋美斯後備入替，都無補於事，最終爆冷輸波。雖然美斯同門將達史特根有少少傷，加上巴塞周中又要踢歐聯所以要留力，不過巴塞下周二歐聯嘅對手只係些路迪，仲要喺主場比賽，咁都驚？
C朗復出入波兼寸嘴
至於巴塞嘅死敵皇家馬德里就表現清風送爽，前鋒基斯坦奴朗拿度（C朗）傷癒復出即刻入波，幫球隊於主場5:2大勝奧沙辛拿。不過，由於呢場足智彩開出嘅盤口係皇馬[-3]，皇馬雖然贏波，但就唔多益捧場客囉！講開C朗，佢小器嘅性格就真係要改，好似前巴塞中場沙維早前接受訪問時講過「C朗同美斯活在同一年代真係唔好彩，既生瑜何生亮」，C朗喺贏咗奧沙辛拿賽後就回敬：「我係網絡上被搜尋次數最多嘅球員！好多人想搵我做封面同幫佢哋宣傳！我點解要理沙維講乜？佢𠵱家喺邊度打波？卡塔爾？佢未贏過金球獎，我贏過三次！」