蘇偉賢升任練馬師以來成績有目共睹，過去三番四次受訪時，佢都特別品題「夢幻仙子」呢匹旗下生力軍，擺明心中有馬。結果呢匹四歲馬冇令佢跌眼鏡，這天在第二場四班草地1200米1.9倍輕勝，譚詠麟、元彪及「桂神」黃興桂，都有到場撐馬主馬氏一家並拉頭馬。
「夢幻仙子」配郭能被捧成一面倒大熱，跑法主動，沿途望空走二叠，咬實放頭馬「心思熟慮」嚟跑，贏馬決心好大。直路上，「夢幻仙子」稍被催策下，即超越放到七七八八的「心思熟慮」，彈離贏近三馬位，今季一出即勝，服役4戰2冠1亞1殿，今場獨贏派彩19.5元，組合獨贏A1亦派同一金額。
郭能繼開鑼日憑「四季勁」爆冷食出全季頭糊後，又為「夢幻仙子」建功，連續第二次沙田日賽有馬贏，而「夢幻仙子」加分後將肯定要跑高一班。反觀雷神將「心思熟慮」發揮得無咎無譽，無奈馬不如人，佢只能做二奶，但3.2倍大熱Q順利開出，雷神卻未能延續昨日（10日）在澳洲客串炮製級際賽孖寶的威勢。
今場由早段到衝線，都係由前面四駒包辦前四名，「夢幻仙子」、「心思熟慮」跑一、二名，而三、四名則由一對冷馬「駕悅」、「珍珠有利」瓜分，四重彩派3,011元。