有「西環契仔」之稱嘅候任立法會議員何君堯，政界認定佢肯為阿爺「博到盡」而得寵，力谷佢入立法會，或者係要成為阿爺嘅強力大炮。何君堯都好識做，未上任已經向阿爺「找數」，前晚喺社交網站facebook直播，借中秋節食生果，力撐建制派嘅蛇齋餅糭手法無不妥。嘩，西環又可以領功咯！
送簽名海報畀fans
何君堯直播時邊食日本蘋果邊回應支持者提問（圖），話中秋節到嘞，享受吓啦，強調送禮係中國人嘅文化同禮貌表現、並非只為選票投其所好，指蛇齋餅糭背後係想「𠱁吓老人家開心」！
佢仲話積存咗百幾張選舉海報，會陸續寄出簽名海報畀支持者，感謝支持者時坦言，「係有人覺得我乞人憎」，相信有人對佢先入為主，但堅稱有能力令人「唔好咁憎我」，歡迎大家同佢多溝通。