風水師麥玲玲最近俾銀行懷疑佢洗黑錢，仲講到可能要凍結佢戶口，搞到玲玲師傅變成嬲嬲豬呀！
最近股市旺番些少，華華走去問麥玲玲，趁個市調整買番少少滙豐控股（005）、渣打（2888）好唔好呀咁，點知佢一聽到渣打就火滾。
話說佢幫襯渣打多年，一向相安無事，今年初有銀行職員搵佢，要求佢解釋點解每個星期都有一筆錢存入銀行，麥玲玲解釋話，佢做風水師幫人睇相、睇風水，一向收現金，收到錢咪存錢入銀行囉，佢去內地工作收人仔，仲提供埋內地銀行戶口資料。
點知事隔半年，渣打又有職員問佢相同問題，仲講到有可能凍結佢戶口。麥玲玲又驚又嬲，諗緊係咪要取消渣打戶口，轉去幫襯其他銀行，或者儲多啲月餅罐，將錢收埋床下底！
鬼咩，麥玲玲咁富貴，上個月隨便就拎385萬銀畀首期，同員工夾份買入嘉亨灣一個770萬銀嘅單位，可能佢每星期都存一百幾十萬入渣打，嚇親人呢。麥玲玲即刻耍手擰頭話冇咁多錢，仲話「中環好多醫生一星期收100萬銀現金，我只係正常收入咋」。
其實自從2008年金融海嘯後，全球監管機構都加強對銀行嘅監管，早幾年滙豐同渣打又被美國指反洗黑錢不力而遭罰款，難怪佢哋對於客戶嘅資金往來咁緊張嘅。有銀行界朋友都話，今時今日，麥玲玲呢個情況閒過立秋，可能係前線員工問得冇技巧啫。
渣打回應話，不就個別客戶情況作評論，但佢哋會因應客戶可能涉及嘅風險水平作盡職審查，以確保有效執行風險管理、打擊洗錢同反金融罪行的措施。