只差一步，香港壁球隊就可以再創歷史！噚日喺馬來西亞吉隆坡舉行嘅世界大學生壁球錦標賽，港隊以頭號種籽身份出戰壓軸嘅男女混合團體決賽，先由男單歷史首金得主葉梓豐贏得第一場，可惜未能乘勝追擊，最後以場數1:2不敵二號種籽、東道主馬來西亞屈居亞軍，繼2010年後再次喺呢項團體賽奪銀牌。
下周一23歲牛一嘅男子個人賽金牌得主葉梓豐，噚日幫港隊打頭陣，以3:0擊敗大馬嘅袁艾仁先拔頭籌；港隊跟住派出女單世界排名50嘅湯芷穎，對住世界排名27嘅劉薇雯，兩人曾經喺女單決賽碰頭，可惜湯芷穎再次係落敗一方，輸局數0:3。嚟到決勝第三場，港隊由個人賽銅牌得主黃祉謙對Sanjay Singh Chal，可惜力戰下以2:3敗走，最終以場數1:2屈居亞軍，但今屆世大壁球賽已經係港隊最好成績嘅一次，總共奪得一金兩銀一銅。
兩日後再戰澳門
有心唔怕遲，港將戰罷世大運後今日返港，隔兩日就要出發去澳門，備戰今個禮拜展開嘅澳門公開賽，希望佢哋可以重新出發，話唔定再遇大馬球手，到時大打爭氣波，報番世大一箭之仇。