喺新界西連任嘅新民黨田北辰，被指曾經就住喺港鐵站內謝票，打電話畀港鐵車務營運總管李聖基，惹來施壓之嫌。雖然田二少強調冇要求李聖基包庇自己，但唔少人依然好質疑，好似民主黨主席劉慧卿咁吖，原來佢日前就此查詢過港鐵主席馬時亨，想知今次事件來龍去脈。
卿姐同八方講，日前透過WhatsApp查詢肥馬，有關田二少喺站內謝票一事，卿姐認為港鐵應該道歉，覺得今次做法離晒大譜，質疑如果可以咁樣謝票，第時大把候選人都會去逼爆港鐵啦；佢引述肥馬話，完全唔知情，會去了解吓！
雖然肥馬至今未有答案畀卿姐，但相信卿姐唔擔心肥馬走數，皆因佢話肥馬過去處理投訴都處理得好快，包括最近上水水浸路軌一事，5分鐘後即刻回覆，效率高過政府官員㖭！