選舉之後，不少人大駡甚麼「雷動計劃」，指責始作俑者戴耀廷搞亂檔，連「港大護法」徐詠璇都鬧港大副教授一份，少見也。左丁山由頭到尾對「雷動計劃」不甚了了，根本不知如何運作，亦從未收過呢個計劃嘅指示，但2012年選舉時，已在本欄講過，民主派自由派人士天生唔會聽人點，鍾意自己下決定；容易俾人點，俾人叫向東就向東，去西就去西嘅人，本質上一定係民建聯、工聯會嘅忠心搵食富商或基層年老教育較少嘅人物，故此自由民主派好難配票，民建聯工聯會就好容易配票，非建制派搞配票，多數蝦碌！左丁山從來唔buy。更何況，講資源多，可動員之工人數目，民建聯工聯會有龐大資源與國家力量支持，幾十年前嘅電話都可以搵番出嚟，「雷動計劃」何來如此把炮？
涂謹申之飽吃驚風散，並非因為配票出錯，而係好多人一早以為涂謹申贏梗，加埋陳方安生李柱銘親自出馬為鄺俊宇造勢，號召力極大，所以不少選民猛投鄺俊宇一票，事先連阿涂都好輕鬆，周圍叫人支持小鄺，到午後先知死，佢算好彩，對手策略上放棄王國興，力保周浩鼎，於是阿涂先可以贏咗0.6%，即10694票，險過剃頭，假若中聯辦建制派真係配票完美嘅話，由李慧琼選票拉走二萬票俾王國興，阿涂已經成為李卓人。由此事可知，配票係高難動作，好容易出差錯。
一位新民主同盟關永業，本已棄選超級區議會（9月3日港大民調得2%，已知輸梗），選後上商台節目講番，好似唔順氣，指民主派若配票得宜，預埋佢一份，民主派可得超級區議會四席，呢樣係典型事後孔明。在超區投票，民主派總共得110.8萬票（58%）民建聯工聯會得80.1萬票（42%），如果有完美方程式配票，民主派（涂謹申、梁耀忠、鄺俊宇、關永業）4人每人得27.7萬票，建制派3人每人得26.7萬票，確係民主派四人當選，但如果建制派棄王保周，將80萬票分成李慧琼28萬，周浩鼎28萬，王國興得餘下24萬，結果仍然係民主派三席，建制派二席。以上當然係假設，目的在顯示一啲人放馬後炮都未經過思考。搞競選，好現實，一見到民調對自己太過不利，就要轉型或退縮止蝕，瞇埋眼鬧鍾庭耀民調不科學不可信，咁樣搞政治法會輸死一世。賴戴耀廷，駡戴耀廷係典型輸波賴地硬啫。