季內首次泥地賽將於周日(11日)上演，共編排兩場，其餘八場係草地，徐雨石馬房一向泥地成績特佳，上季便在泥地贏八Win，喺各廐中排第一。
睇番前季首次泥地賽，徐雨石憑「辣手先鋒」贏馬，上季首日跑泥地，徐廐兩匹參戰馬「頌友」及「飛躍之駒」亦悉數上名，咁今次泥戰徐廐有「藍天飛馬」及「情意相投」分別強配潘頓和羅理雅列陣，機會又點呢？
其中第四場四班泥地1200米，兩位女馬主鄭是鳳與鄧詠琪聯名愛駒「情意相投」，上季5月跑同程，直路從包尾位置衝上第四，末段快至21秒96頂班時間，原來是上季泥地1200米最快末段締速，可見厲害。羅理雅、徐雨石開鑼日合作勝出「紅牡丹」，因此齋睇「情意相投」的配搭，已顯示攻堅決心。
至於第八場三班泥地1200米之「藍天飛馬」，四次角逐泥地1200米得兩亞一第五，冇獎金之役只因流鼻血，路程性能不用懷疑，今仗賽前試大閘，僅不敵二班馬「越影」及一班馬「壯思飛」跑第三，可見回勇，力足加入爭勝。