今季兩戰過後，女將蔣嘉琦暫獲「萬事欣」一場頭馬，戰績不能算好。周日(11日)沙田賽事她有8駒上陣，能否來個大爆發呢？
以動態來看，第七場四班1600米的「駕善」最似樣，事關嘉琦8匹座騎中，今朝賽前一日最後備戰，她只替此駒出操，在內圈踱步，可見重視程度，而馬兒走起來生猛有勁，埋門狀態冒升得很快。
「駕善」曾跑田草1600米5次，得冠亞季各一成績，此程演出算幾可靠。事實上唞暑後嘉琦返港復課以來，幾乎一手一腳打理「駕善」，踱步、快跳、彈草閘以及試泥地大閘，嘉琦都親力親為，今次對手唔太強，人馬力足為練馬師呂健威打開今季勝門。