香港兩名乒乓球女將黃家汶同吳玫薈，雙雙殺入里約殘奧TT11女單四強，至少幫香港攞到一面獎牌，真係好嘅開始。上屆殘奧金牌得主黃家汶，上周五喺小組賽反勝波蘭選手入四強；吳玫薈亦喺另一組取得四強席位，二人會喺巴西時間周日分途出戰，唔理晉唔晉到級，港隊最少攞到一面銅牌，當然大家都期望佢哋可以奪金啦！
乒乓二人上周六休息一天，周日再爭過。至於上周六嘅比賽，有曾兩獲提名競逐勞倫斯大獎嘅硬地滾球手梁育榮出場，佢將會出戰雙人賽嘅小組賽。
至於綜合上周五全日嘅殘奧比賽，中國就成為大贏家，贏咗13金8銀8銅，其中中國威盡游泳場館，單日拎咗五面游泳金牌，同埋每面都係以破世界紀錄嘅成績拎到，而喺男子S6級50米蝶泳同埋S8級100米蝶泳仲包辦晒前三名，真係屈機！
許慶一日擸兩金
冇咗半隻手臂嘅游泳名將許慶係主角，佢先喺S6級50米蝶泳奪金，再喺4x50米自由泳接力20分決賽封王，一日兩金，佢運動員生涯加埋已有九面殘奧金牌。嚟緊佢仲會玩三個項目，有機會再攞牌。