啱啱以些微票數喺立法會選舉落敗嘅西貢區議員哪吒方國珊，噚日現身高等法院，為咗前年喺立法會公眾席展示標語同喧嘩罪成罰款單案。方國珊希望申請上訴到終審庭嘅許可證明書，佢話睇番今次選舉投票人數破紀錄，預計未來將會有更多人喺公眾席表達不同意見，公眾有權知點先會犯法。
今次哪吒上訴嘅理據，主要係話控罪違反言論同示威自由，涉及重大而廣泛重要性嘅法律論點，又話立會議員不時都會展示令人不愉快嘅標誌，但會議都可以繼續，點解公眾席上示威表達意見就唔得？代表哪吒嘅大狀話，今次立會投票人數破回歸以來紀錄，可見廣大市民關注政治議題同立會運作，將有更多人喺公眾席表達意見，但點先算犯法，終審庭仲未有案例。
法官黃崇厚最終批准佢嘅申請，但哪吒仍要過上訴委員會嗰關，先知可否上到終審庭。
哪吒呢單案係關於佢前年5月趁立會審議將軍澳擴建堆填區撥款嗰陣，喺公眾席展示標語同喧嘩，搞到會議中斷，結果被控違反按《立法會（權力及特權）條例》發出的行政指令，罰款兩千蚊。佢今年5月曾經上訴，但被駁回。