新民黨喺今屆立法會直選有3張名單勝出，點票當日，新民黨主席葉劉淑儀未有等到佢參選港島選區嘅點票結果，就俾傳媒影到佢名下嘅白色七人車，直接駛入中聯辦停車場，逗留約50分鐘後離開。
曾稱不在車內
事後葉劉話只係送書畀中聯辦，指自己不在車內。不過佢噚日同傳媒茶敍時就改口，承認自己係應邀去西環商討問題，又聲稱佢只係「誤導」傳媒喎！
當日葉劉唔睇點票，聲稱回家休息，其實去咗西環，但佢架車圍上黑色布簾，所以傳媒問佢，佢話自己當時不在車內，只係司機送書畀中聯辦，記者只好信佢講，但葉劉噚日同傳媒茶敍，就改口承認當日有去中聯辦應邀商討問題同埋送書，佢突然咁改口，在座記者梗係要問清楚佢，究竟去西環傾乜嘢、究竟去見邊一個？但葉劉一概唔肯講，只係話當時容海恩不在車上，自己亦絕對唔係去謝票，仲話如果要謝票，佢都係去街度謝票喎！葉劉亦有向《明報》致歉，話佢之前誤導咗《明報》！
至於喺新東勝出嘅容海恩，佢一直俾人叫「西環契女」，葉劉話冇乜所謂，花名呢啲乜都有人講，佢都孭咗「掃把頭」好耐喇，但容海恩唔係咁睇，話呢個標籤對佢團隊唔公平，令人覺得佢哋冇實力。
李八方
mailto:[email protected]
