練馬師方嘉柏剛在谷草開鑼戰憑「事必獲利」、「勝利名星」及「越影」中三元，氣勢正盛。周日（11日）沙田賽事，方廐陣容依然大堆頭，上仗特首盃跑第四、匆匆再出爭第九場一班1400米廣東讓賽盃的「豪逸」固然惹人憧憬，另一受矚目馬應是第三場五班1400米之「齊齊健康」。
大家別看「齊齊健康」只是匹普通五班馬，今季因胡森散倉而加盟方廐，原來近年方嘉柏只接收過表兄胡森一匹馬，正是上季加盟後七戰獲兩冠兩位的「索咖啡」，所謂前人種樹、後人乘涼，「齊齊健康」分分鐘係另一胡森寶藏。
「齊齊健康」上季初輸兩場後，即由告東尼轉投胡森，全季亦以轉胡廐初出首戰表現最好，當時44分跑四班1400米追得亞軍，只不敵及後再添三Win殺上二班的「錶之勝」（已退役）。今戰「齊齊健康」又轉廐初出，身處五班角逐，並起用方廐愛將杜利萊。
記得此駒早在8月31日試1200米泥閘，在杜利萊胯下交出悅目走勢，起步後刻意拖後，末段發力追趕跑第二，試閘後有個特別鏡頭，方嘉柏罕有地走落隧道接「齊齊健康」，然後命杜利萊落馬向他匯報，騎練動態肉緊。
杜利萊說：「當日『齊齊健康』的試閘走勢令我留下良好印象。牠是典型後上馬，今場關鍵在於是否有正常步速，開鑼日多場由後上馬取勝，唞暑後場地利追，希望今戰亦如此。」