曾經支持特首梁振英選特首嘅藝人黃秋生，噚日同梁振英一齊現身文藝界國慶酒會，不過兩人好似零交流咁。八方問秋生仲撐唔撐梁振英連任，估唔到秋生反而話梁振英嘅潛在對手、財政司司長曾俊華都OK喎！
實情秋生呢排排戲排到七彩，根本未有時間諗特首選舉嘅問題，問到佢仲挺唔挺梁嗰陣，佢都只係話到時先算啦！而且佢好識做，無論梁振英同曾俊華都各打五十大板，譬如話梁振英就夠高大、曾俊華亦唔錯，總之有得選就好，事關有競爭先有進步。至於有冇興趣參選選委，佢即刻耍手擰頭話唔好搞佢，因為佢自稱政治覺悟低呀。
講到啱啱完嘅立法會選舉，秋生只係覺得好亂，「冇簽（確認書）嗰啲又（參選）得，簽嗰啲又唔得，我都唔知乜嘢咁咯！」但至少佢都希望啲新生代入到去可以為議會帶嚟新氣象。