港鐵主席馬時亨噚日出席工商界婦女國慶活動時，其間除咗同「龍蝦」梁唐青儀咬耳仔，更𠱁得唐英年媽媽唐尤淑圻十分開心。
話說唐媽媽一到場，肥馬即充當帶位員兼保鑣，全程攬實唐媽媽，帶唐媽媽到所屬座位，可謂相當細心，難怪獲得唐媽媽舉起手指公大讚，唔少在場婦女亦搵肥馬合照。
肥馬活動後透露，下個月將同曾俊華去哈薩克斯坦考察，積極配合國家「一帶一路」政策，更會推銷港鐵新設的「港鐵學院」，希望吸引更多海外朋友去學院讀書。對於立法會選出唔少「反高鐵」議員，包括新界西「票王」朱凱廸，肥馬就話，港鐵一向好注重同議員溝通，佢已經親身寫信恭賀新議員當選，希望佢哋多啲了解港鐵運作，有乜疑問佢好樂意聽喎。