練馬師霍利時剛周三晚「驍武」搏失跑第二，不敵「勝利名星」，令時廐今季仲未開齋。作為倉主之霍利時，當然心急求突破。周日(11日)沙田賽事，霍利時便有機會爭番啖氣，事關第五場四班1400米之「情趣」便好有實力，而且亦有晒搏殺動靜。話說今朝6時已見雷神莫雷拉喺馬房閘口等操馬，原來在等「情趣」，冇耐「情趣」出嚟換雷神上馬，即見霍利時行到旁邊，向雷神給予操練指示，兩個傾咗一大輪，擺明對今仗充滿期望。而當「情趣」操完，霍利時亦老早喺同一位置接馬，夠晒緊張。「情趣」上季尾跑同程1400米，初配雷神即跑第三，亦是此駒在港首度上名，表現大有進步，難怪霍利時mark實雷神唔放手，今戰人馬再來抽4檔好跑，必拚求交代。