噚日文藝界搞國慶酒會，特首梁振英同財政司司長曾俊華都有到場。表面上梁特好似受歡迎啲，到場時唔只有大會贊助人之一嘅霍震霆、「梁粉」馬逢國迎接，入場後又有大堆賓客搵佢影相，不過梁特致完辭，台下有位聲稱來自視覺藝術界嘅女士大叫「梁振英下台」。須知道選委會入面，文化同演藝合共有近30票，點睇都好緊要，如果梁特要連任，就要多下苦功喇！
至於另一特首黑馬曾俊華，似乎喺演藝界嘅支持都唔弱，鬍鬚曾到場無耐就坐咗上台，鬍鬚曾唔似梁特咁風騷。但八方見到，鬍鬚曾到場時，阿姐汪明荃一見到佢就笑晒咁口，仲好有心咁同鬍鬚曾講「返嚟喇」，似乎阿姐都有留意鬍鬚曾嘅動向。唔只咁，人稱Ming Sir嘅資深藝人劉兆銘仲好耐人尋味咁問鬍鬚曾「記得？」鬍鬚曾亦微笑答Ming Sir「記得！」可見兩人關係非淺。