曼市打吡一觸即發，曼聯和曼城球星嘅另一半爭妍鬥麗，亦一樣咁有睇頭。球迷成日話紅魔中堅基斯史摩寧嘅女友曲姬（Sam Cookie）索，不過睇得多都悶，今次不如睇下首次參戰嘅WAGs生力軍。
巴禾老婆超sweet
藍月領隊哥迪奧拿踢走門將赫特，虛位以待畀哥迪奧巴禾，佢有機會喺今晚場波上陣把關。巴禾老婆卡娜（Carla Pardo）係一位熱情奔放嘅甜姐兒，對眼都好似識笑嗰隻，佢喺社交網站度經常會放啲泳衣相同大家分享，一啲都唔孤寒。巴禾同卡娜識於微時，大家喺埋一齊已經十幾廿年，仲有兩個小朋友㖭，認真幸福。至於同樣第一次出戰曼市打吡嘅曼城中堅史東斯，佢女友美娜（Millie Savage）就屬於文靜嬌小類型，拍住六呎二嘅史東斯側邊，只係去到佢心口咋。
曼聯方面，前鋒伊巴謙莫域同老婆海倫娜（Helena Seger）係老妻少夫，現年45歲嘅海倫娜唔係小鳥依人類型，而係走型格路線，佢同伊巴應該都係趣味相投。
另一位今夏嘅曼聯新兵，喺八月力壓伊巴成為紅魔最佳球員嘅中堅艾歷拜利，喺夏天同新東家簽約冇耐之後就做老襯，同女友雲妮莎（Vanessa Troupah）拉埋天窗。