又一位體壇女神要結婚喇！據日本《日刊體育》周四報道，乒乓球名將福原愛喺里奧幫日本贏到女團銅牌之後，今個月初偷偷地同中華台北球手江宏傑註冊結婚；不過瓷娃娃嘅粉絲唔使咁擔心，因為佢做咗江太之後會繼續打波㗎。
曾同錦織圭拍散拖
福原愛同江宏傑嘅戀情，喺今年四月初俾日本傳媒踢爆，而佢哋兩個之後亦都大方認愛，仲不時喺社交網站上載合照晒幸福。
27歲嘅江宏傑話自己十幾歲參加東亞少年乒乓球錦標賽嗰陣，就已經認識福原愛，但直到2014年底知道佢腰椎間關節受傷，先鼓起勇氣喺fb同佢講嘢，關心吓佢嘅傷勢，去到上年終於示愛成功。
其實27歲嘅福原愛多年嚟都冇乜緋聞，只係曾經喺2008年公開咗同日本網球名將錦織圭拍拖，不過兩個聚少離多，一齊咗四個月就分手。
據日本傳媒指，福原愛同江宏傑喺里奧完結後，就開始計劃結婚，今個月初仲向東京都政府遞交結婚申請書，有消息指佢哋結婚後都唔會更改國籍，會繼續為日本同中華台北打波，爭取出戰2020年東京奧運。
另外，中國跳水夢之隊近日去咗拍攝國內綜藝節目《天天向上》，當中最受關注嘅，梗係秦凱同何姿呢對未婚夫婦啦。30歲嘅秦凱喺節目度大爆自己喺里奧向何姿求婚嘅過程，話自己想喺奧運畀個驚喜女友，所以用咗30幾個鐘去籌備；佢仲大爆隊友全部都勁有義氣：「除咗要去比賽嘅隊友，其他人全部都嚟晒幫我。」
秦凱又向何姿求婚
至於25歲嘅何姿就講笑話，由於當時對自己喺女子三米板屈居亞軍有啲失望，心情唔係幾好，所以唔係好記得男友係點樣求婚。
點知，就喺呢個時候，秦凱突然拎起紮花，再次跪地向佢求多次婚，令到何姿又忍唔住眼濕濕。原來秦凱一早就同節目製作人夾好，要重演呢個情節，而佢哋仲透露，已經同雙方父母商討結婚嘅相關細節㖭。
