禮拜日沙田八草兩泥賽事，草地用C跑道，睇番上季初首次田C欄八匹草地頭馬，竟有六駒排一至四檔起步，可見內檔優勢好大，至於跑法方面，居中後上馬唔蝕底，好似「精彩時機」、「駕翠」、「有得威」及「美麗大師」等都係留守中後位置，入直路憑後勁反先對手，所以不宜過份側重內叠前置馬。
今戰列陣馬中，二場「好醒」兩次跑田C欄未失前四名，亦係全場唯一贏過此移欄之參戰馬，值得優先留意。另外，七場「神威福將」兩戰C欄1600米均非冠即亞，憑較佳場地性能可穩入前列。
至於兩場泥地均跑1200米，近日持續有雨或跑濕泥，上季三場濕泥地同程頭馬「紅旗飛將」、「海紅寶」及「三和福將」全部放頭贏，四場「有禮」及八場「藍天飛馬」等擅跑泥地之快放馬可留意。