近排歐洲受熱浪侵襲，西班牙係受影響最嚴重嘅地方之一，部份地區最高曾經錄得攝氏40度，持續咁熱嘅話，今個周末日間上演嘅西甲賽事或者要改期。
西班牙聯賽會（LFP）主席迪巴斯（Javier Tebas）表示，如果熱浪持續，唔排除部份賽事要被迫改時間甚至改期上演：「如果氣溫有成36或37度，根本冇可能進行足球比賽。」當地時間中午左右上演嘅西甲賽事就最高危，重點賽事包括切爾達主場對馬德里體育會，同埋皇家馬德里迎戰奧沙辛拿。
C朗美斯齊齊ready
有冇西甲賽事要改期仲有待確定，不過兩大球星就已經準備就緒。因傷代表唔到阿根廷出戰周二世盃外嘅美斯，似乎已經冇大礙，仲喺周三復操；至於基斯坦奴朗拿度（C朗）亦準備好喺今季首次披甲，佢同教練施丹已經有共識，會喺周六對奧沙辛拿場波上陣大約60分鐘。