「香港需要改變，而改變需要時間。我同我嘅隊會盡一切努力，進入議會，將本土嘅聲音帶入議會，以制衡政府，請大家支持我哋。我係四號，劉惠晴。」咦？明明係游蕙禎嚟，點解變咗劉惠晴嘅？
原來游BB早排處女下海幫ViuTV拍處境劇《三一如三》，呢集「選戰風雲」喺大選後翌日（5號）播放，劇中游BB做番自己立法會候選人嘅角色，喺街上派宣傳單張同講解理念，甚至喺鏡頭獻吻冧宅男（圖）㖭！雖然游BB第一次拍劇，但因為佢喺劇中做番自己，演技當然自然流暢。不過，現實中游BB當選咗，劇中就冇交代佢係咪勝出。
《三一如三》監製兼導演陳志發同八方講，部劇係游BB未宣佈參選前已搵佢拍，希望更貼地同喺正經喺議題上加入年輕同靚女元素，增添活力同新意。想唔想再合作？陳志發話：「梗係想，但佢𠵱家忙做議員，唔敢打擾。」