立法會投票日時講過「冇咗一國點會有繁榮穩定」嘅全國政協副主席兼前特首董建華，噚日以團結香港基金會名義，喺港麗酒店閉門宴請傳媒高層，《信報》總編輯郭艷明、有線電視新聞執行董事趙應春、NOW新聞及財經資訊首席副總裁張志剛、港台中文新聞部採訪主任黃金鳳、商台新聞及公共事務部副總監羅輝、《南華早報》總編輯譚衛兒等亦獲邀出席。
阿董到場時被問會否跟進周永勤被恐嚇退選一事只答：「大家好！」問佢立法會選舉結果，係咪反映市民不滿特首梁振英？佢回頭話：「對唔住」，繼而快步行入酒店。
阿董離開時，就被問如何解讀多名自決派當選立法會議員？阿董就話喎：「食咗飯未呀？食咗飯未呀？」記者答「未」後，阿董皺一皺眉然後表示：「對唔住啊，第日有機會詳細同你哋傾」，跟住阿董就上咗車咯！
趙應春飯局後話，阿董呢個團結香港基金會，不定期都會約傳媒高層飯敍，講述基金會嘅研究，噚日飯局冇乜講立法會同特首選舉，只係主力講經濟政策喎。