梁振英話「明顯反對我嘅人冇當選」，但佢冇話畀大家知，明顯支持佢嘅人全數低票落選，包括矢言「CY實在太完美」嘅陳玉娥同正義聯盟李偲嫣呢對新東雙嬌。
奪486票嘅娥姐票倉究竟喺邊？原來係喺沙田嘅乙明邨、水泉澳邨第一期、山下圍一帶，一共攞到15票，其次係將軍澳彩明苑一帶，取下13票咁多。143個新界東票站中，娥姐喺17個票站捧蛋。
李偲嫣嘅得票都唔少㗎，有成2,938票咁多。佢嘅票倉原來係喺沙田嘅禾輋邨，一共奪得74票，至於另一個票倉竟然係喺馬鞍山迎海、銀湖天峰、烏溪沙村、同雅典居一帶，攞到多達55票。143個票站入面，佢只喺沙田文禮閣一帶食蛋，比起陳玉娥算係成績斐然。
而娥姐同偲嫣嘅得票率喺普遍票站低到得零點零、最多唔超過2%。