立法會選舉結束後，竟然爆出「娥頸橋之戀」，估唔到新界東參選嘅公民黨楊岳橋同梁粉陳玉娥，因為一場選戰擦出火花。諗起嗰張AY同娥姐喺台上相遇嘅面貼面親密照，相信好多AY女粉絲都傷心了，但當事人（定係受害者？）AY噚日講起呢張爆紅相，就一直笑咪咪。唔通仍在回味，同娥姐難得親密嘅世紀時刻？
志雲大師：似戀人輕吻
呢張相片連日已經喺網上引起熱議，當然唔少得改圖潮，仲有人二次創作《勾手指尾》MV，直情變咗城中大事。AY噚日出席商台節目，主持人陳志雲都問及此事，AY一提起娥姐就掩嘴笑，仲話「受寵若驚」，仲自揭點解同娥姐擦出火花。
佢話喎，當日一眾候選人喺大會公佈當選名單後，上台影相，「咁啱小弟同玉娥姐同時間喺台上面，咁啱有啲互動，俾唔知咩人影低咗，咁就變成幾有趣嘅圖畫箒。」
咁點解AY同娥姐二位，當日喺台上行來行去（嗱，行來行去咋，唔係眉來眼去）？AY解釋：「我以為佢（娥姐）要行去台嘅另一邊，咪讓個位畀佢，咁啱喺行過嘅途中，（對呢件事好肉緊嘅志雲形容係黃金交叉點……）大家握個手，普通寒暄一兩句。」
講到淡淡然，志雲似乎唔多滿意，笑指AY高過娥姐，睇起來就似一對戀人，而AY就好似向下輕吻……呢句似乎嚇親AY，佢笑指：「大家聽得881，應該唔想聽啲903嘅嘢」，暗示都係講番正經嘢，巧妙地打圓場。
李八方
mailto:[email protected]
