股評人黃德几前晚po咗一條拍緊戲嘅片上facebook，片中有佢、鄧聲興、「大隻佬」郭思治、藺常念等股評人圍埋一齊，人人都話自己係股神，場面似層相識，幾似《竊聽風雲2》入面幾位「地主會」股壇老手開壇。
郭sir透露，今次佢哋係義務性質幫人拍微電影，佢呻過程幾辛苦，短短幾分鐘嘅微電影，佢哋前晚花咗六、七粒鐘先至完成拍攝工作。其實每人只得一兩句對白，但因為大家十分業餘，成日NG，拖到半夜12點先有得走。
聞說，最累街坊嘅係鄧聲興，成日NG，佢都承認自己戲屎，拍群戲時，一輪到佢講對白，佢就忍唔住笑，拖慢咗整個拍攝進度。至於邊位最好戲，佢同黃德几異口同聲大讚郭sir，指對方交到戲。郭sir就好謙咁話，佢只係面皮厚，唔怕醜啫。