英超曼市打吡喺禮拜六舉行，但氣氛未有劍拔弩張，雙方賽前先禮後兵，唔見有互相挑釁。曼聯前鋒伊巴謙莫域送衫畀曼城門將哥迪奧巴禾，歡迎佢嚟到曼市；英媒就傳紅魔主帥摩連奴想同曼城領隊哥迪奧拿修補關係，賽後邀請佢飲紅酒咁話。
伊巴贏宣傳輸最佳球員
伊巴除咗踢波勁，仲好有生意頭腦，今夏已經借曼聯過橋，喺社交網站故作神秘話有大事宣佈；正當全世界以為佢宣佈加盟曼聯，原來係發佈個人品牌，搞到包括我求大俠在內都俾佢呃咗，睇晒成個發佈會。嚟到曼市打吡前，伊巴又搞噱頭嘢，將佢出嘅運動衫送畀巴禾，扮晒老友咁，仲留言話：「歡迎嚟到曼市，呢度有啲訓練裝備，你應該需要嘅。我哋星期六見啦！」結果各大英媒加埋本報都喺度一齊幫佢賣廣告，所以話伊巴嘅網絡營銷手段真係高，值得唔少大公司學習。不過，曼聯最新公佈八月最佳球員，球迷就相當有品味，伊巴只係得票37%，另一新兵、中堅艾歷拜利就以55%高票當選。
摩佬抄爵爺傳統望破冰
當伊巴同巴禾扮晒老友，摩連奴似乎都想同哥迪奧拿做番朋友。以前費格遜教曼聯嗰陣，最鍾意賽後搵對手領隊飲紅酒，但呢個傳統隨住佢老人家退休就冇咗，前領隊雲高爾仲將費格遜喺奧脫福間辦公室改裝做戰術分析室。不過，摩帥就恢復番爵爺嘅傳統，叫曼聯執番靚間房，等佢請人飲紅酒。據英國《太陽報》話，摩帥已經搵定支靚酒，希望打吡戰後約哥帥飲番杯。雖然佢哋以前喺西班牙教波嗰陣勢成水火，但後生嗰陣喺巴塞都幾老友，成日攬頭攬頸，唔知呢場曼市打吡同紅酒可唔可以幫手破冰呢？
至於曼聯嘅舒韋恩史迪加同曼城嘅耶耶托尼真係同病相憐，兩位都唔得新帥歡心。曼聯禮拜三晏晝開會傾賽前部署，朗尼同迪基亞都揸車到場，同時間「小豬」就揸車走人。耶耶多新聞但內容日日唔同，前日話佢想一月走人，但英國《每日郵報》噚日就話耶耶會努力訓練博續約喎。