嗰頭講緊這晚快活谷第二場「勁飛聖」勝出，為鞍上人雷神莫雷拉本周六澳洲跑大賽壯行色，呢頭又有另一團隊壯行色，就係騎練田泰安、苗禮德同「多福」系馬主。
苗禮德泥地王「積多福」身在韓國，準備周日(11日)夥拍田泰安出戰沙地1200米韓國短途錦標，該駒馬主劉耀棠之子劉懿暉，於這晚第四場四班一哩出「招多福」，結果呢匹四歲英國自購馬突如其來，配田泰安直路尾長驅直進，衝過晒所有對手，爆94倍巨冷win開齋，組合獨贏A3派27.5元。
「招多福」馬主劉懿暉老婆原來係韓國人，呢勻幫「積多福」歷史性香港馬首度遠征韓國造勢，「招多福」過去六戰全十名以外零獎金，今場表現可謂石破天驚，亦成為新季度暫時最冷頭馬。
苗禮德表示「招多福」今仗爆冷，完全是意料之外，上季此馬一直受腳患困擾，影響陣上成績，今晚傾盆大雨，場地鬆軟，可能令牠的腳部跑來冇咁辛苦，跑出水準。
騎練蘇狄雄、沈集成呢場唔好彩，合作「歐洲之星」頂唔住「招多福」衝刺做二奶，構成5,024元Ｑ。三、四名順序「實在威」及「捷捷勝」，四重彩派彩接近118萬。