由赫特到耶耶托尼，大家成日都討論哥迪奧拿嘅棄將，搵位插哥帥不仁不義，唔念吓老臣子嘅功勞。其實足球世界好殘酷，成敗論英雄，如果攞到冠軍，自然冇人批評，輿論就變成讚哥帥有決斷力；如果成績唔掂，當然就係圍插哥帥亂棄功臣啦。
有人失寵，自然另一邊就有人得寵啦！正如樹根同MC興嘅離去，就代表新契仔契女嘅出現。喺曼城班舊將入面，亦有幾位球員深得哥迪奧拿歡心，牽牛兄想講吓大衛施華，咁小弟就講吓佢位拍檔費蘭甸奴。哥迪奧拿季初呢幾場用4-1-2-3陣式，費蘭甸奴就係當中「1」嘅正選，擔任攻防樞紐。
之前喺比歷連尼麾下，費蘭甸奴係做一個輔助嘅角色，走上走落，幫耶耶托尼執吓手尾咁。當哥迪奧拿今夏接手後，好多傳媒估計佢會改革中場，棄用耶耶，買啲親信返嚟，點知郁得最少嘅就係防中呢個位！因為哥帥認為費蘭甸奴就係曼城嘅布斯基斯。
哥迪奧拿曾經大讚費蘭甸奴夠全能，除咗守龍，其他10個位置都踢得：「佢踢乜位置都勝任，佢夠快，夠醒目，係個具侵略性同擅頂嘅球員可以踢中堅，亦可以發起進攻。」
買咗史東斯後，曼城夠中堅用，唔使勞煩費蘭甸奴長期踢中堅住，但當曼城進攻時，呢位巴西中場識睇住班後衞嘅走位，自動自覺退落中堅位。例如史東斯帶波上去，費蘭甸奴會退落去補位；如果兩閘衝晒上去，佢又會退落兩個中堅之間，拉闊防線，變相為三中堅。
不過嚟緊對曼聯係費蘭甸奴同哥迪奧拿嘅挑戰。之前對弱隊，就算打一個防中，大衞施華同奇雲迪布尼間中返嚟幫吓手就可以，但紅魔中前場實力咁強，一個費蘭甸奴頂唔頂得住呢？
文：咖喱