今屆立法會選舉特別之處，係投票前夕好多泛民候選人棄選，好似超區嘅公民黨陳琬琛、民協何啟明同新同盟關永業都喺選前棄戰，最終泛民保住超區3席。
其實棄選係好難嘅決定，好似陳琬琛咁，佢預計選舉開支最少要300萬；同佢結婚兩年、任職醫管局護士嘅太太就義無反顧攞咗200多萬公積金撐佢。琛哥坦言太太知悉佢棄選時，最初都唔能夠接受，經佢解釋先釋懷，講到呢到仲爆喊。
琛哥為大局而犧牲，令到唔少人動容。公民黨就為琛哥嘅選舉開支發起網上眾籌，佢哋話推動超區選舉工程需要龐大資源，琛哥為咗成全大局而停止拉票，所以都想聊表心意，故此發起「籌募選舉捐贈」運動以支付琛哥選舉工程開支，會按法例要求作申報。公民黨話眾籌反應理想，已達六位數字，多謝各方支持，而琛哥同公民黨會承擔部份選舉經費，暫時預計眾籌維持約兩星期。