重慶麻辣火鍋聽到大家垂涎欲滴，唔知終審法院首席法官馬道立同律政司司長袁國強會唔會趁住訪重慶時試一試？
司法機構同律政司司長發言人噚日分別出稿，公佈馬道立同袁國強會喺今日起訪問重慶兩日，十號返港。兩人同時北上重慶，係要出席中華司法研究會2016年年會暨第二屆中華司法研究高峯論壇。
中華司法研究會係由中國法官協會同相關學術組織成立嘅專業學術團體，主要研究海峽兩岸、港、澳司法同法律理論、制度，今屆主題為「變革中的社會、變革中的司法」，探討包括「一帶一路」戰略嘅法治保障等，馬道立會喺開幕禮致辭；袁國強則守尾門喺閉幕禮致辭。
袁國強仲會同最高人民法院院長周強會面，而高等法院首席法官張舉能則會陪同馬道立出席。