立法會選舉完畢，好多人都話今屆立法會係新舊更替，係正式由年輕人接捧的一年，議政方面大家都未有頭緒，不過唱歌跳舞方面就絕對接得住！
舊屆－
曾鈺成：
曾主席成日獻唱，仲話自己唱羅文比較耍家，首本名曲有《小李飛刀》，之前喺餞別立會主席晚宴就演唱咗改詞版嘅《忘盡心中情》寸盡一眾議員。
新屆－
陳志全：
成功連任嘅慢必都係唱得之人，一早同快必譚得志做兒童節目時已經合唱過兒歌，之前同財委會主席吳亮星多次因撥款事宜搏鬥後，佢就upload咗首自己試唱的改詞版《陀飛輪》－《陀衰家》上網，都算接到主席又唱得又幽默呢支棒啦！
舊屆－
譚耀宗：
令人最難忘嘅一定係佢嗰首《舊歡如夢》啦！紅色閃閃西裝加紅色煲呔又唱又跳咁，你都咪話唔殺食！
新屆－鄺俊宇：
鄺神，又寫愛情小說，又作曲作詞，人人以為，佢係，逗號王、票王，嘅時候，原來，佢唔係文青，係舞王！因為，鄺神未當選，點票之際就俾人回帶，睇返佢九年前嘅跳舞片，嘩吓，跳埋moon walk𠻹！
舊屆－
張宇人：
雖然今屆都仲有佢呀，但66歲都要準備好交棒啦！唱K小宇人咁愛清唱改編自《You Raise Me Up》的《無怨的信念》，「難避免 都只因我站前線……」我哋都一樣，避免唔到你繼續站前線。
新屆－
鄭松泰：
鄭松泰今年5月時喺街頭派康乃馨同巿民慶賀母親節，派晒花之後再高歌一曲《真的愛你》。如果你在立會唱歌，我哋一定支持，唔使小宇人一個唱晒咁悶嘛。
舊屆－
蔣麗芸：
都係啦，今屆仲有佢嘅！係人都知立法會元秋唱得，上年年頭請記者上佢屋企搞團拜，佢就高歌咗一曲梅姐嘅《心債》，佢妹妹蔣麗萍曾經係歌手，仲話鍾意唱歌都係因為家姐咋！
新屆－
容海恩：
法律界‧偽‧桂綸鎂，聲稱識打跆拳道仲愛唱又愛吹……小號，同鄺神一樣，一當選就俾大家回帶，起番佢兩年前喺一個慈善活動入面唱《夢伴》嘅片出嚟，咦？又係唱梅姐喎！立會低音歌后呢個稱號有人爭啦！
記者：容慧心
