雖然國泰（293）上半年業績麻麻，要停止招聘非重要職位節省開支，但為咗滿足旅客對食嘅要求，所以佢哋都會不時搵餐廳合作，令飛機餐有啲新特色吸引旅客。今次就搵咗中環卅二公館（Mott 32）合作。
有趣嘅係，卅二公館位於中環渣打大廈地庫，呢幢大廈屬於恒隆地產（101），國泰與恒隆有一個common factor，咪就係陳南祿囉，陳南祿由國泰過檔恒隆都有5、6年，唔通有份牽線？不過大家都係唔好諗多咗，聽聞國泰搵卅二公館合作，唔關陳南祿事，陳生最多只係幫襯過佢哋啫。
講番國泰呢個新嘅飛機餐，家陣至11月，多條由香港出發嘅長途航線，包括去澳洲、歐洲、北美洲航線，乘客都可以試到，包括北京烤鴨絲沙律、醬烤三弄美國安格斯牛肋骨等，不過卅二公館名菜之一「黑毛豬叉燒」同傳統中式點心就唔見有喇。