保特（右）喺今屆奧運完成3x3嘅創舉後，就俾人發現佢喺里約熱內盧同倫敦不斷夜蒲，而佢女友姬絲（左）似乎都因為咁而發嬲。不過，呢位牙買加飛人近日就決定帶埋姬絲，飛去位於南太平洋嘅小島Bora Bora度假，𠱁番呢位正印女友。據聞佢哋喺Bora Bora入住嘅四季酒店，一個禮拜嘅房價成12,500鎊（約13萬港元）㗎。
保特仲喺社交網站上載姬絲幫自己搽太陽油嘅片段（右圖），係咁曬恩愛，似乎想用行動回應兩人分手嘅傳聞。雖然近日網上不斷瘋傳保特嘅snapchat截圖，上面寫住句「She said yes（佢話我願意）」，不過保特經理人就證實閃電並冇向女友求婚喎。