有美斯就贏波，冇美斯就差啲輸波！周二嘅世盃外南美區，有美斯缺陣嘅阿根廷作客榜尾委內瑞拉，一度落後兩球，臨尾追番2:2完場。至於有尼馬嘅巴西主場以2:1贏咗哥倫比亞。
上周四有美斯喺度，佢射入一球，幫阿根廷主場贏烏拉圭，但因為佢有傷，提早退隊返巴塞隆拿休養。周二呢場一冇美斯，阿根廷走晒樣，迪馬利亞帶唔起隊波，一度落後到0:2。好在明尼路射手柏拉圖喺58分鐘入番球，加埋中堅奧達文迪喺83分鐘追平，阿根廷先至唔使喺呢支魚腩身上全失三分，踢成2:2，搶番一分。另外，有西班牙傳媒指美斯會將三歲嘅大仔堤亞高送入巴塞嘅幼童足球計劃，美斯之前講過堤亞高對足球冇乜興趣，希望呢個計劃可以令堤亞高鍾意足球啦。
另外幾場世盃外，巴西嘅尼馬繼續入波，加埋祖奧米蘭達建功，主場以2:1擊敗哥倫比亞，力壓阿根廷升上第二位。至於烏拉圭就有蘇亞雷斯同基斯甸洛迪古斯入波，以及卡雲尼梅開二度，主場以4:0大勝巴拉圭，繼續做榜首。
