「常備保濟丸，有病唔使怕」，呢句廣告歌詞大家應該由細聽到大，保濟丸亦可能食過唔少，唔講唔知，保濟丸原來同「李兆基」有關㗎!
不過，此李兆基唔同彼李兆基，並非最近狂賣超豪劏房嘅恒地（012）主席李兆基，亦唔係嗰位綠葉演員，而係120年前喺始創「保濟丸」嘅中醫李兆基。
李兆基1896年喺佛山創立「李眾勝堂」，最初以賣一隻叫「普濟茶」嘅涼茶起家，之後發展到造藥，保濟丸就係咁面世嘞。其後，李兆基走難嚟到香港，喺文咸東街開門市，從此就成為港人熟悉嘅中成藥之一。
去到2010年，李兆基嘅後人正式將保濟丸業務，賣畀雅各臣科研製藥（2633），雅各臣𠵱家就以保濟丸做招牌，加埋其他產品，好似電視成日賣廣告嘅唐太宗活絡油，成間公司招股上市。
根據招股書，董事會入面並冇李氏後人，不過保濟丸紙盒上面，仍然印住李兆基個嘜頭。
雅各臣行政總裁岑廣業話，李兆基個嘜頭夠晒signature，唔少香港人甚至遊客，一望到個盒就認到係保濟丸，一啲都唔覺老土，反而認為係一種香港「集體回憶」，所以佢從來冇諗過幫佢轉新包裝咁話。