香港著名時裝設計師鄧達智（William、小圖）早前以「蕃茄炒蛋」，形容中國隊嘅里奧隊服，今次佢見到最新嘅香港保齡球隊隊服，就用「薯嘜」去形容喎。不過，港隊大師兄胡兆康就力撐新衫「紅得好睇」，服裝呢家嘢從來都係各花入各眼，最緊要係港隊喺今個月18號展開嘅亞洲保齡球錦標賽入面，個個紅到攞獎冇停手！
胡兆康撐紅色好睇
香港保齡球隊噚日出席亞錦賽記者會，賽事18至28號喺南華會保齡球場舉行，港隊會派出六男六女，着住紅噹噹、仲有維港景色圖案嘅全新隊服出戰。球手就對呢套新戰衣有唔同意見，有啲睇唔出圖案係維港景喎，但康仔話：「隻紅色我鍾意喎！」
小記就傳咗張相畀鄧達智評吓啦，佢第一眼嘅感覺係：「好大陸！」原來William曾經應邀幫中國運動員設計隊服，佢話對方事先聲明，設計一定要有幾個元素，第一係要有國旗嘅紅色，第二係紅色以外只可以用白色，第三就要有同中國有關嘅元素，例如景點等。對於今次香港保齡球隊呢套新衫，佢就畀咗少少意見：「有幾度可以做得更好，好似cutting太鬆，遮住咗運動員嘅美好身形，放維港景嘅做法都有啲古老。紅色係sharp，但唔夠香港特色，整體嚟講睇落有啲『薯』，唔夠現代感同香港人講求型格嘅感覺。」
上月打完泰國賽後，右手指骨膜炎復發嘅康仔，目前喺體院接受治療；佢最想喺亞錦賽可以同一班隊友，繼2012年後再贏到五人隊際賽金牌。不過，傷患搞到康仔落選世界盃港隊遴選賽，最後由師弟麥卓賢攞到，後者下個月會到上海出戰世界盃。