公民黨去年區選出咗個新人王，24歲嘅余德寶喺油尖旺嘅富柏當選。年紀輕加上baby face，唔少人覺得佢好cutie。但查實余德寶有硬朗一面，初中試過北上參加軍事夏令營，見識過真槍實炮有幾勁，但敵唔過佢嘅頭腦清醒，笑稱冇因此行而被洗腦。
難忘中學行catwalk
余德寶有家姐亦有細佬，夾喺中間嘅佢話細個都曳，鍾意四圍走搵嘢玩，同𠵱家一樣係活潑型！就讀余振強紀念中學時，做過班長同風紀，學懂領導才能。中六仲搞埋學生會擔任內務副會長，有籌辦過聯校活動；余振強係男校嚟，會唔會渴求同女校搞活動？佢笑笑口話：「都係平常心面對箒！」
佢嘅中學有兩件難忘事，包括獲薦到深圳參加三日兩夜嘅軍事夏令營，見過真槍實炮，亦見證內地軍人絕對服從嘅紀律性，強調「深入敵陣後都係保持到自己想法」。佢亦記得校內有環保服飾設計比賽，突然被老師邀請做model喺禮堂行catwalk，「都有專登上網參考下模特兒步姿㗎！」
