立法會選舉曲終人散，八方發現，喺建制同非建制以外有「新勢力」。作為傳統名校，無論係港華定九華都為香港培育唔少人才，而當選議員入面，淨係華仁仔都有6個，分別係嚟自港華嘅新東梁頌恆、港島郭偉強同資訊科技界莫乃光，以及嚟自九華嘅勞工界何啟明、九東謝偉俊同超區涂謹申。
今年選舉新舊世代交替，其中23歲嘅香港眾志羅冠聰，就喺港島擸5萬幾票當選，25歲嘅青年新政游蕙禎亦喺九西以逾2萬票獲一席。唔止同樣年輕，兩位同時都嚟自嶺南大學。若果計埋連任嘅嶺大博士畢業生、衞生服務界李國麟，立會「嶺南幫」就有3個人。順帶一提，前嶺南大學中文系助理教授陳云根（陳雲）喺新東以23,635票落選。
議會新丁仲有九西劉小麗同新西鄭松泰，兩個人同樣有教席喺身。劉小麗𠵱家喺理工大學香港專上學院做社會學講師，鄭松泰就喺理工大學應用社會科學系擔任專任導師，連同連任成功嘅黃碧雲及張超雄，新一屆「理大教師幫」亦有4個咁多。