海洋公園哈囉喂10月2日至31日開幕啦。噚日園方就開放咗3間鬼間畀傳媒試玩，大玩視覺效果同80年代恐怖喜劇電影經典場面，唔少行家都嚇到𠵱嘩鬼叫。
吸血鬼主題嘅「心慌血色吧」用3D投影、激光同UV塗鴉，營造陰森氣氛。坊間好多學校鬼古，呢間又話義莊，果間又話日軍刑場，所以另一間鬼屋「屍立中學」加入本地學校元素，隨時有鬼校工、鬼同學嚟嚇你。
主打鬼屋「捉鬼敢死隊Live」一入門就有鬧鬼大宅主人個女「歡迎」，跟住仲要穿過猛鬼地下鐵等先可以「逃出生天」。嫌恐怖？細膽嘅人可到鬼屋旁邊玩「鬼口水」同用雷射槍捉鬼（圖），大人細路都啱玩。