財經界每年其中一項盛事，就係里昂9月在港舉行嘅投資論壇，事關里昂論壇每次都會邀請政商界或演藝界名人來港做演講嘉賓，今年嘅明星嘉賓係《神探俏嬌娃》女星杜莉芭里摩亞（Drew Barrymore）。
Barrymore童星出身，今年41歲，最新消息係佢早前第三度離婚，不過佢都係事業型女性，除咗係演員、導演，亦有經營化妝品、酒等生意，舊年又出書《Ｗildflower》講自己以往經歷。要佢做演講嘉賓，應該大把話題可以講。
里昂以往請過唔少猛人來港，舊年有美國中情局前僱員斯諾登（Edward Snowden）以視像會議現身，之前幾年仲有拳王泰臣、荷李活型男佐治古尼、阿諾舒華辛力加、萬人迷碧咸，每年都令里昂班客仔有所期待。