不少人都說大摩馬房季初較緩進，但睇周三晚(7日)摩廐的「威力川」卻殺氣騰騰，今仗初跑快活谷爭第8場二班1200米，一直都操練不懈，上周五更由雷神親試快活谷大閘，轉急彎十分流暢，輕鬆跑第二已試準，本應做夠工夫等出擊，但大摩還是唔放心，這天(6日)竟安排「威力川」快跳一段再谷一谷，係周三晚各場唯一賽前一日加課出跳馬，擺到明今仗志在必得。
而原來「威力川」馬主曾炳威，近日有入馬房探過此駒，盡露搏殺手影。曾炳威說：「我在馬房見到『威力川』的健康都幾好，牠於9月2日在快活谷試過閘，熟習環境，試閘後莫雷拉都話好滿意，但始終今場初跑谷草，加上同場都有唔少對手列陣，我都有點擔心，不過大摩向我表示，只要『威力川』抽個靚檔，機會樂觀。」結果「威力川」排得三檔，可算求仁得仁，形勢大好。
睇番「威力川」上季尾喺田草1200米輕勝，總時間快至1分08秒07，刷新二班此程班際紀錄時間，亦係上季田草1200米最快締速，盡顯非凡潛質，加上在港用得不多，估計升上一班只係遲早之事。