相信唔少7、80後嘅球迷同求大俠一樣，打《Winning Eleven》成長，雖然隻game人氣有啲下滑，仲連名都改咗叫《PES》，但每次出新一輯都有新元素，所以機迷都好期待。噚日佢哋終於公佈港版嘅廣東話評述由伍家謙同Keyman負責，兩位喺記招仲試玩顯身手，結果和氣收場。
最新一輯《PES2017》噚日公佈今個月中開售，求大俠早前已經收到風，話港版會由伍家謙同Keyman（馬啟仁）負責廣東話評述。果然，呢兩位人氣體育評述員開創歷史，成為呢款遊戲首個廣東話評述員。家謙話玩呢隻Game多年，由當年《Perfect Eleven》玩到《Winning》，到𠵱家叫《PES》。當初聽到今輯有廣東話已經好興奮，但完全冇諗過由自己參與，估唔到自己把聲會喺呢款經典足球遊戲出現，真係好難得嘅經驗。
「波係圓嘅」有親切感
佢仲話，以前完全冇諗過呢款遊戲會有廣東話評述，希望將來喺國際賽mode可以有香港隊：「既然有廣東話評述，下一步就梗係希望可以有香港隊，唔使自己組香港隊，到時玩Game就可以聽到葉鴻輝、陳肇麒、梁振邦呢啲港腳，香港機迷會更有親切感。」
亨利打機教球星扭波
Keyman亦都係由細玩《Winning》玩到大，仲去到每日玩過先安樂嘅瘋狂地步。佢又透露，錄音其實係分開錄，亦冇畫面，好多情況係憑空想像，因為好多唔同情況出現，要模擬唔同形勢，整個錄音長達兩星期。佢仲透露，評述入面會加入唔少地道講波元素同金句，好似「好波不如好運」、「門柱係門將最好朋友」同埋「波係圓嘅」，至於仲有幾多其他金句，大家玩吓就知啦。
唔少世界頂級球星好似美斯、尼馬都係因為呢個Game夠真而成為機迷，比利時前鋒盧卡古仲大爆，新任國家隊助教亨利透過打機教佢哋過人。盧卡古話：「之前備戰外圍賽，亨利拉埋我、賓迪基同夏薩特打機，佢靠打機教扭波，我都覺得自己獲益唔少。」
《FIFA》授權多撼低《PES》
《PES》嘅前身《Winning Eleven》，陪住唔少香港80、90後球迷成長。雖然《WE》唔能夠攞到大部份球隊版權，球迷要攞住記憶卡抄檔案，當時都大受歡迎，特別係「Master League」，球迷可以自己組最強球隊。至於擁有大量球會版權嘅《FIFA》近年迅速冒起，已取代《PES》嘅足球遊戲龍頭位置。《FIFA16》喺所有機種嘅銷量達1,612萬，而《PES2016》只有148萬，接近每11個人玩《FIFA》先有一人玩《PES》。
