傳統打工仔智慧，多張沙紙傍身總係好，明年開始，銀行從業員可以統一考個「銀行專業會士」（Certified Banker）專業資格，老闆一睇，就知你咩斤兩，唔使多費唇舌解釋自己有幾勁。
銀行學會行政總裁梁嘉麗（Carrie）話，留意到唔少銀行打工仔周身刀，專業資格一大堆，但負責招聘嘅HR好多時無所適從，唔知邊個先係最適合某個職位，所以學會明年開始，會簡化現有嘅唔同專業資格架構，新設Certified Banker，從業員由入門第一級考到第三級，連同考試雜費、書簿費（買參考書）等，約2.5萬至5萬蚊左右。
過往如果你已經透過學會考取嘅銀行專業資格，唔需要重考，會自動銜接到新架構之下，互相認證。
Carrie話，本港各大銀行都有參與討論呢個新Certified Banker資格，有個別大型銀行更加商量緊點樣安排員工上堂，同埋將呢個新資格納入銀行自己嘅進修資助計劃入面，即係公司畀錢你讀書。咁都算係一種鼓勵嘅，好過冇啦。