唔少富豪名人對港島南區豪宅情有獨鍾，前政務司司長陳方安生胞妹陸方寧生亦唔例外。方寧生同老公陸鍾漢持有嘅壽臣山道東獨立屋，最近就以1.5億元賣咗，賺5,700萬元。
田土廳顯示，新買家叫Cai Xiao Ming David，名字跟貴聯控股（1008）主席蔡曉明相同。
呢間屋建築面積有4,331呎，實用2,840呎，江湖傳聞，放售咗一排，今次賣出，建築呎價3.43萬元。方寧生兩公婆喺2008年聯名買入，當時買入價9,180萬元，持貨8年，沽出賺5,700萬元，升幅有成62%。影星關之琳亦曾經持有同一條街嘅獨立屋。
除咗壽臣山呢間屋，早兩個月，市場都有傳，同樣由方寧生兩公婆持有嘅淺水灣南山別墅，有買家出價1.6億元想買，未知交易落實未，若落實沽出，兩個月左右，方寧生就套現3億元。