賣帽起家嘅飛達帽業（1100）上市就快16年，老闆娘顏寶鈴一向勤力，噚日佢話，自己做嘢做到人工幾多都唔知，舊年先至第一次向公司拎花紅咋。
睇番飛達年報，顏寶鈴舊年獲取花紅314萬元，連埋底薪、福利，全年袋走478萬元，較對上一年增加1.1倍。顏寶鈴解釋話，原本都冇諗過拎花紅，只係細仔顏肇翰有次問佢，點解從來唔向公司拎花紅，咁佢先至決定拎花紅，仲因此要交百幾萬稅，慘豬咁話。
唔好以為佢多咗錢，就拎去濕平，佢話，已經將一部份錢拎去做善事。另外，佢對員工幾好，公司將會請香港區員工去日本沖繩玩幾日，孟加拉與內地廠房員工就分別去泰國同北京。