今屆嘅立法會選舉結果都有啲驚喜㗎，好似功能組別咁，人人都以為建制派贏硬啦，泛民無機，吖，點知有人得咗！喺建築、測量、都市規劃及園境界參選嘅中大學者姚松炎，最終擊敗爭取連任嘅謝偉銓，晉身立法會！
查實呢，佢選前嘅勝算未被看好，但佢一直表現輕鬆喎，前晚凌晨抵達機場博覽館點票中心等待結果時，突然同個傘兵、喺飲食界參選嘅伍永德相擁（圖），八方以為佢當時已經計到，知自己會勝出，所以同人抱抱慶祝，但原來八方諗多咗，原來佢兩個本身係老友，瞓身拉票咗一日後喺博覽館相遇，格外感動，所以雖然兩個都係男人，都即時擁抱互相支持。