滙豐、渣打孭住國際性銀行大名，驚住客戶洗黑錢又累到銀行罰錢，成日俾中小企投訴開戶困難，搞到金管局要頻頻解話，反而中銀香港（2388）就夠抵錫。金管局總裁陳德霖唔單止山長水遠去到沙田水泉澳邨，畀面出席中銀嘅視像櫃員機啟動儀式，仲特登寫篇《匯思》推銷。
金管局一向唔會開名評論個別銀行，好似噚日陳德霖被問到中小企開戶困難，都只答係「主要有一至兩間大型國際銀行」開戶成功率不高。
不過，佢最新一篇《匯思》網誌就提到「有間大型本地零售銀行」積極擴充中小企業務，又將零售銀行網點升級云云，雖然都係冇開名，但配埋一張陳總笑住參觀中銀香港分行嘅相，真係畫公仔畫到出腸。
陳總又特登去水泉澳邨，參觀中銀部視像櫃員機，家陣好多銀行已經推出相關服務，中銀呢項服務就一星期7日、全日24小時運作。陳總喺《匯思》忍唔住又話，雖然未必太多人會半夜搵銀行，但都好欣賞銀行實踐普及金融嘅誠意。