大家前晚瞓唔瞓得着？八方都瞓唔着嘞，為咗選舉結果囉囉攣，最驚泛民稍有閃失，失咗議會關鍵否決權就大劑咯，好在最終選民都用選票幫手守護香港，阻止建制派任意橫行。之不過呢，中聯辦真係唔算輸得晒，至少兩位新愛將新界東嘅容海恩同新界西嘅何君堯，都成功入局，加上原有嘅九東契仔謝偉俊同九西契女梁美芬都順利連任，新一屆議會有一班「契」字派，唔知點樣為阿爺做世界？
謝偉俊喺九龍東以47,527票連任之時，梁美芬喺九龍西以第二高票49,745冧莊，呢對舊契仔、契女力保西環面子不失之餘，西環再有進賬，選前已經被高度看好嘅容海恩，一如所料喺新界東9席中佔一席；何君堯則喺新界西以35,657票險勝李卓人取末席，繼區選後再下一城。四位「契」字派喺立法會，唔知會唔會特別投契？
清一色來自法律界
大家有冇發現，西環「契」字派係有個共通點，登登登凳，就係清一色係法律界。而又咁啱得咁蹺，何君堯同謝偉俊同樣係律師；容海恩同梁美芬係大律師。而唔知大家知唔知，梁美芬2008年初次參選九龍西之時，身為佢城大法律學生嘅容海恩係有為佢拉過票㗎，唔通當時，已經種下呢段獲西環寵愛嘅因果情緣？
相信大家好想知，何君堯同容海恩係乜來頭，可以獲西環咁寵幸。54歲嘅何君堯老竇係何新榮，同陳日新、劉皇發齊名，號稱屯門三大元老，愛國背景唔使懷疑，而佢喺反佔中時咁出力，相信好打得作風深獲西環賞識。
至於39歲嘅容海恩，家族背景暫時未有大揭秘，但有傳媒曾報道，與佢同住嘅家人曾任國企高層，莫非呢個就係佢被寵愛嘅玄機？有傳西環喺新東「棄彪保容」，放棄工聯會鄧家彪而力保容海恩有一席，可見後台犀利！似乎西環力捧新人，已經有可見套路；如果要上位，有法律界背景顯然有優勢。
李八方
mailto:[email protected]