英格蘭周日作客斯洛伐克嘅世界盃歐洲區外圍賽F組比賽，係英軍新任領隊「大儍」艾拿迪斯上任後首戰。新舊利物浦球員就成為呢場波關鍵，前紅軍中堅史卡迪爾攞紅牌，搞到斯洛伐克打少個；英軍就靠現效利物浦嘅中場拉爾拉拿95分鐘絕殺對手贏1:0，旗開得勝。
原本呢場波嘅焦點落喺英格蘭隊長朗尼身上，佢老哥今場第116次代表英軍出戰，壓過碧咸成為國家隊出場次數最多嘅非門將球員，但佢坐鎮中場都係冇咩料到。不過，史卡迪爾57分鐘怒踩哈利卡尼（小圖），搞到兩黃一紅被逐；英格蘭最終靠拉爾拉拿喺補時五分鐘射穿斯國門將馬圖斯高沙錫嘅大細龍門，幾經辛苦先贏1:0。大儍賽後話英軍贏波合理，但進攻就要改善吓，佢仲多謝一位傷健球迷賽前喺酒店送咗個幸運銀幣畀自己，果然帶嚟好運。
